Nukte.kz > Slider > ماقالا مازمۇنى

نەكە نەگە بۇزىلادى؟

قازىر اجىراسۋ كوپ. استانا قالاسىندا وتكەن جىلى سوتقا 5358 تالاپ ارىز كەلىپ تۇسكەن. 4852 ءىس قارالىپ, ونىڭ 324-ءى تاراپتاردىڭ تاتۋلاسۋىمەن اياقتالعان ەكەن. جالپى, اجىراسۋدىڭ الدىن الۋعا بايلانىستى استانا قالالىق سوتىنىڭ ۇيىمداستىرۋىمەن وتكەن شارادا ايەلدەردىڭ قوعامداعى ءرولى, بالا تاربيەسى, وتباسىلىق داۋلار كەڭىنەن تالقىلاندى.

اتالمىش شارا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا كورسەتىلگەن مىندەتتەردى ىسكە اسىرۋ ماقساتىندا ءوتتى. وعان پارلامەنت ءماجىلىسىنىڭ دەپۋتاتى زاعيپا باليەۆا, قازاقستاننىڭ ىسكەر ايەلدەرى قاۋىمداستىعىنىڭ پرەزيدەنتى راۋشان سارسەمباەۆا, قالالىق سوتتىڭ توراعاسى تىلەكتەس بارپىباەۆ, قر جوعارعى سوتى جانىنداعى سوت تورەلىگى اكادەميياسىنىڭ ۆيتسە – رەكتورى نازيليا راززاق, پسيحولوگتار, مەدياتورلار مەن وسى ساناتتاعى ىستەردى قارايتىن اۋداندىق سوتتاردىڭ توراعالارى مەن سۋديالارى قاتىستى.

استانا قالالىق سوتىنىڭ توراعاسى تىلەكتەس بارپىباەۆ بۇل ماسەلەنىڭ ماڭىزدىلىعىن ەرەكشە اتاپ كورسەتتى. نەكە بۇزۋ پروتسەستەرى بويىنشا 2017 جىلدىڭ ستاتيستيكالىق كورسەتكىشىن كەلتىرە وتىرىپ, اجىراسۋدىڭ جىل سايىن ارتىپ كەلە جاتقانىن تىلگە تيەك ەتتى.

ال دەپۋتات زاعيپا باليەۆا: «بالا قىلمىسكەر بولىپ تۋىلمايدى, كەرىسىنشە دارىندى بولىپ تۋىلادى. بالا تۇلعاسىنىڭ قالىپتاسۋىنداعى نەگىزگى سۋبەكتىلەر –اتا-انا. قوعامنىڭ مىندەتى – دارىنداردى تاربيەلەۋگە قولايلى ورتانى قۇرۋدى قامتاماسىز ەتۋ» دەدى ءوزىنىڭ بايانداماسىندا. جيىنعا قاتىسۋشىلار وتباسىن ساقتاۋداعى سوتتىڭ ءرولىن ايرىقشا باعالاپ, نەكە بۇزۋ پروتسەستەرى كەزىندە مەدياتسييا ءراسىمىن قولدانۋ ارقىلى داۋدى سوتقا دەيىن رەتتەۋ پرينتسيپىنە جانە داعدارىستى جاعدايلاردى شەشۋدە پسيحولوگ كومەگىنىڭ قاجەتتىلىگىنە ەرەكشە كوڭىل اۋداردى.

كەزدەسۋدىڭ ەكىنشى سەسسيياسىندا ءىس-شاراعا قاتىسۋشىلار «الجير» مۇراجاي-مەموريالدى كەشەنىنە بارىپ, مەموريالعا گۇل شوقتارىن قويدى.

بوتاگوز بايانوۆا

ءبولىسۋ: 

پىكىر 0

مىندەتتى*