Nukte.kz > Qoğam > Maqala mazmunı

Äriptesimiz «100 jaña esim» qatarında

Semeydegi fïzïka –matematïka bağıtındağı Nazarbaev Zïyatkerlik mektebiniñ matematïka päniniñ muğalimi Anar Baymurzaeva ustazdar arasında «100 jaña esim» qatarına endi. Dälirek aytqanda, QR Prezïdenti N.Ä.Nazarbaevtıñ «Bolaşaqqa bağdar: rwxanï jañğırw» attı bağdarlamalıq maqalasındağı «Qazaqstandağı 100 jaña esim» jobasın jüzege asırw maqsatında bilim berw uyımdarınıñ muğalimderi men oqıtwşıları arasında ötken «Jıldıñ üzdik ustazı» attı respwblïkalıq bayqawına qatısıp, 2 –şi därejeli dïplommen marapattaldı. Sonday –aq onıñ esimi üzdik jüzdik toptastırılğan arnayı jïnaqqa jazıldı.

L.N.Gwmïlev atındağı Ewrazïya ulttıq wnïversïteti, Astana qalası Bilim basqarması, «Bilim – orkeniety» ulttıq ïnnovacïyalıq ğılımï –zerttew ortalığı birlese uyımdastırğan awqımdı şarağa respwblïkamızdıñ barlıq öñirlerinen bilikti de bilimdi ustazdar qatısqan. Bayqawdıñ maqsatı – darındı pedagogtardıñ ïnnovacïyalıq ïdeyaları men ğılımï älewetin arttırıp, olardıñ qoğamdağı märtebesin köterw.

– Bul bayqawda är muğalimniñ ömir jolı, bilim salasına siñirgen ölşewsiz eñbekteri, jetken jetistikterinen bölek sabaq berwdegi metodïkalıq şeberlikteri bastı nazarğa alındı. Bilimniñ jaña bir şıñına şığıp, öz biliktiligimdi osınday awqımı keñ bayqaw, sayıstarda sınaw men üşin özdi –özime sın közben qarawmen teñ. Osı arqılı men öz bilimimdi tekseremin. Xakim Abay:«Adamnıñ adamşılığı jaqsı ustazdan boladı», -dep bekerden –beker aytpasa kerek. Keleşek urpaqtıñ jaña zamanğa say, bäsekege qabiletti bolwı bizderge tikeley baylanıstı desek, ustazdar qawımı ünemi izdenis üstinde bolğanı abzal. Sonımen birge bar jïğan –tergeniñdi şäkirtiñe berwmen qatar, türli baqawlarda baq sınağan artıq etpeydi dep tüsinemin, -deydi jas ustaz Anar Batırğazıqızı.

Bala küninen ğılımnıñ atası sanalğan matematïkağa degen äwestigi basım Anar Baymurzaeva bizdiñ mektebimizde 2014 jıldan beri eñbek etip keledi. Jañalıqqa janı qumar, bilimge umtılğış jas ustaz soñğı 4 jıldıñ işinde 1 märte respwblïkalıq, 1 märte xalıqaralıq därejede ötken şığarmaşılıq festïval’ men konferencïyada 1 –şi orındı jeñip alğan. Endi mine, Ult Köşbasşısınıñ özi bastap bergen «100 jaña esim» jobasına enip, üzdikter qatarınan oyıp turıp orın alıp otır. Qoğamdıq şaralarğa belsene qatısatın äriptesimizdiñ boyında birneşe öneri bar. Sonıñ işinde än salıp, dombıra, bayan, akkordeon aspaptarında erkin oynaytındığın böle-jara atawımızğa boladı.

– Matematïkağa degen maxabbatımnıñ arqasında osı sala mamanı bolwı üşin mektepten bölek 10 jıl waqıtımdı arnadım. Aldımen kolledj, sosın ïnstïtwt, artınan magïstratwranı üzdik bitirip, ustazdıq joldı tañdağanıma eş ökinbeymin. Mwzıkalıq bilimim de az emes. Degenmen kürdeli esepterdi şığarw, onıñ şeşimin tabw men üşin öte qızıqtı edi. Är adam öziniñ aldına qoyğan maqsatına jetw üşin talmay eñbektenwi kerek. Sonda ğana oydağı arman jüzege asadı dep bilemin. Endigi oyım – bäsekege qabiletti, uşqır oylı, bügşingi zaman talabına tolıq jawap bere alatın bilimdi şäkirt tärbïelew, -deydi öz mamandığına adal äriptesimiz.

Közdegenine jetpey tınbaytın Anar Batırğazıqızınıñ kezekti jeñisi mektebimizdiñ abıroyın tağı bir märte asqaqtata tüsti. Aldağı waqıtta jeñisti joldar jalğasa bersin demekpiz.

Ermek Ïsabaev,

Semey qalasındağı fïzïka –matematïka bağıtındağı Nazarbaev Zïyatkerlik mektebiniñ baspasöz xatşısı

Bölisw: 

Pikir 0

Mindetti*