Oqwşılar ardagerlermen kezdesti-Nukte.kz
Nukte.kz > Slider > Maqala mazmunı

Oqwşılar ardagerlermen kezdesti

Keñes äskerleriniñ Awğan jerinen şığarılğanına bïıl 28 jıl. Tarïx qoynawına enip, sanadan kömeskilenip bara jatsa da, 10 jılğa sozılğan soğıstıñ layıqtı bağası äzirge tolıqqandı berilgen joq. Dese de, äskerï ant qabıldap, Otan aldındağı borışın twğan elinen jıraqta ötegen ïnternacïonalïst – jawıngerler öskeleñ urpaq üşin ülgili jandar. Elimizdiñ erteñi jastarımızdı otanşıl, patrïot retinde tärbïelewde sübeli üles qosıp jürgen awğan ardagerleri Otandı süyu ärkimniñ boyında bolwı kerek qasïet ekenin jïi aytıp keledi. 24 qaraşa küni semeylik awğan soğısınıñ ardagerleri qalamızdağı fïzïka-matematïka bağıtındağı Nazarbaev Zïyatkerlik mektebiniñ arnayı şaqırwımen kelip, oqwşılarmen kezdesti.

Oqwşılar ardagerlermen kezdesti

Kezdesw barısında jalındağan jastıq şaqtarın ottı jıldarğa arnağan ïnternacïonalïst –jawıngerler şäkirttermen jüzdesw barısında äskerï ömirlerinen sır şertti. Kezdeswge kelgen Aleksandr Cvetkov pen Sovet Aytbaev jetkinşekterge tärbïelik mäni zor estelik äñgimelerin ayttı. Kezdeswdi mektep dïrektorınıñ beyindi éksperïmentaldıq jumıstar jönindegi orınbasarı Raygül Qayırkenova jürgizip, oqwşılardıñ awğan soğısı  jaylı xabardar ekendigin atap ötti.

– Qurmetti oqwşılar! Awğan soğısı jaylı buğan deyin sizdermen 2 sabaq ötkizgenbiz. Jalpı Keñes äskeriniñ urıs – qïmıldarı jöninde qulağdarsızdar. Sol soğısta Keñes äskeriniñ quramında Otan aldındağı azamattıq borıştarın ötegen örimdey jastardıñ arasında bizdiñ jerlesterimiz de boldı.Bügin biz solarmen kezdesip, urıs dalasındağı jağdaydı estip biletin bolamız. Özderiñdi tolğandırğan, qızıqtırğan sawaldarıñ bolsa, ağalarıñ jawap berwge äzir, -dedi Raygül Altınbekqızı öziniñ alğısözinde.

Oqwşılar ardagerlermen kezdesti

Oqwşılar jawınger ağalarınıñ äskerge qalay, qaşan alınğanınan bastap, maydan dalasında jürip ötken joldarı, körgen qïınşılıqtarı jayında surap bildi. Tipten bügingi beybit ömirde nemen aynalısatındarın, Ükimet tarapınan qoldawdıñ qanşalıqtı ekendigin de estidi.

–  1979 jıldıñ şilde ayında Semeydegi qazirgi kölik kolledjin tämamdap, qolıma dïplom aldım. Biz osı oqw ornın bitirisimen birden äskerï komïssarïatqa şaqırıldıq. Eger biletin bolsañızdar, äskerge şaqırw mawsımı köktem jäne küz aylarında jürgiziledi. Soğan qaramastan jazdıñ ortasında armïyağa alınıp, aldımen birneşe ay oqw – jattığw jïındarına qatısıp, dağıdalanğan soñ soğıs örti tutanğan Awğan şekarasınan öttim. Bizden eşkim «soğısqa barasıñ ba?», – dep surağan emes. Äskerï ant qabıldap, qolımızğa qarw aldıq. Soğıs basqa memlekettiñ awmağında jürgizilse de, biz ïnternacïonalïstik borışımızdı ötedik. Osını tüsinseñizder eken, äytpese biz eşqanday da basqınşı emespiz, beybit xalıqqa oq atqanımız joq, -dedi awğan soğısınıñ ardageri Aleksandr Cvetkov.

Oqwşılar ardagerlermen kezdesti

– Aleksandrdıñ aytıp otırğanına mende qosılamın. Köpşilik Keñes äskeriniñ awğan jerine enwin türlişe joramaldaydı. Biraq şındıqtı bile bermeydi. Awğan soğısına bizdiñ aralaswımızdıñ birden –bir sebebi – sol kezdegi awğan memleketiniñ basşısı bizdiñ el basşılarınan kömek suradı. Ekinşiden, biz öz elimizdiñ oñtüstigin qazir «lañkes»atap jürgen türli qarwlı toptardan qorğadıq. Soğıstı awızben aytıp jetkizw oñay emes. Qanşama qarwlas dostarımızdan ayırıldıq. Sondıqtan awğan soğısı oñay ötti degender bolsa, senbeñizder. Özimiz 2 jıl sol maydanda jürsek te, ata-ana, twğan –twısqandarımızğa soğısta jürgenimizdi aytpaytınbız. Ärïne olar bizdiñ Awğanstandajürgenimizdi bildi, biraq soğısıp jürgenimizdi anıq bilmeytin, – deydi Sovet Muratulı.

Ardagerler aytqan estelikterdi tuşçına tıñdağan oqwşılar soğıs taqırıbınan bölek, ïnternacïonalïst – jawıngerlerdiñ jeke bastarına qatıstı sawaldarın da joldadı.

Kezdeswdi mektep dïrektorınıñ beyindi éksperïmentaldıq jumıstar jönindegi orınbasarı Raygül Qayırkenova qorıtındılap, awğan soğısınıñ ardagerlerine mektep ujımı, oqwşılar atınan alğıs ayttı. Soñınan qos jawıngerge  mektebimizdiñ önerli 8 sınıp oqwşılarınıñ qolınan şıqqan töltwındıların estelik retinde tabıs etti.

Semey qalasındağı Nazarbaev Zïyatkerlik mektebiniñ baspasöz qızmeti

Bölisw: 

Pikir 0

Mindetti*