وقۋشىلار ارداگەرلەرمەن كەزدەستى-Nukte.kz
Nukte.kz > Slider > ماقالا مازمۇنى

وقۋشىلار ارداگەرلەرمەن كەزدەستى

كەڭەس اسكەرلەرىنىڭ اۋعان جەرىنەن شىعارىلعانىنا بيىل 28 جىل. تاريح قويناۋىنا ەنىپ, سانادان كومەسكىلەنىپ بارا جاتسا دا, 10 جىلعا سوزىلعان سوعىستىڭ لايىقتى باعاسى ازىرگە تولىققاندى بەرىلگەن جوق. دەسە دە, اسكەري انت قابىلداپ, وتان الدىنداعى بورىشىن تۋعان ەلىنەن جىراقتا وتەگەن ينتەرناتسيوناليست – جاۋىنگەرلەر وسكەلەڭ ۇرپاق ءۇشىن ۇلگىلى جاندار. ەلىمىزدىڭ ەرتەڭى جاستارىمىزدى وتانشىل, پاتريوت رەتىندە تاربيەلەۋدە سۇبەلى ۇلەس قوسىپ جۇرگەن اۋعان ارداگەرلەرى وتاندى ءسۇيۋ اركىمنىڭ بويىندا بولۋى كەرەك قاسيەت ەكەنىن ءجيى ايتىپ كەلەدى. 24 قاراشا كۇنى سەمەيلىك اۋعان سوعىسىنىڭ ارداگەرلەرى قالامىزداعى فيزيكا-ماتەماتيكا باعىتىنداعى نازارباەۆ زيياتكەرلىك مەكتەبىنىڭ ارنايى شاقىرۋىمەن كەلىپ, وقۋشىلارمەن كەزدەستى.

وقۋشىلار ارداگەرلەرمەن كەزدەستى

كەزدەسۋ بارىسىندا جالىنداعان جاستىق شاقتارىن وتتى جىلدارعا ارناعان ينتەرناتسيوناليست –جاۋىنگەرلەر شاكىرتتەرمەن جۇزدەسۋ بارىسىندا اسكەري ومىرلەرىنەن سىر شەرتتى. كەزدەسۋگە كەلگەن الەكساندر تسۆەتكوۆ پەن سوۆەت ايتباەۆ جەتكىنشەكتەرگە تاربيەلىك ءمانى زور ەستەلىك اڭگىمەلەرىن ايتتى. كەزدەسۋدى مەكتەپ ديرەكتورىنىڭ بەيىندى ەكسپەريمەنتالدىق جۇمىستار جونىندەگى ورىنباسارى رايگۇل قايىركەنوۆا جۇرگىزىپ, وقۋشىلاردىڭ اۋعان سوعىسى  جايلى حاباردار ەكەندىگىن اتاپ ءوتتى.

– قۇرمەتتى وقۋشىلار! اۋعان سوعىسى جايلى بۇعان دەيىن سىزدەرمەن 2 ساباق وتكىزگەنبىز. جالپى كەڭەس اسكەرىنىڭ ۇرىس – قيمىلدارى جونىندە قۇلاعدارسىزدار. سول سوعىستا كەڭەس اسكەرىنىڭ قۇرامىندا وتان الدىنداعى ازاماتتىق بورىشتارىن وتەگەن ورىمدەي جاستاردىڭ اراسىندا ءبىزدىڭ جەرلەستەرىمىز دە بولدى.بۇگىن ءبىز سولارمەن كەزدەسىپ, ۇرىس دالاسىنداعى جاعدايدى ەستىپ بىلەتىن بولامىز. وزدەرىڭدى تولعاندىرعان, قىزىقتىرعان ساۋالدارىڭ بولسا, اعالارىڭ جاۋاپ بەرۋگە ءازىر, -دەدى رايگۇل التىنبەكقىزى ءوزىنىڭ العىسوزىندە.

وقۋشىلار ارداگەرلەرمەن كەزدەستى

وقۋشىلار جاۋىنگەر اعالارىنىڭ اسكەرگە قالاي, قاشان الىنعانىنان باستاپ, مايدان دالاسىندا ءجۇرىپ وتكەن جولدارى, كورگەن قيىنشىلىقتارى جايىندا سۇراپ ءبىلدى. تىپتەن بۇگىنگى بەيبىت ومىردە نەمەن اينالىساتىندارىن, ۇكىمەت تاراپىنان قولداۋدىڭ قانشالىقتى ەكەندىگىن دە ەستىدى.

–  1979 جىلدىڭ شىلدە ايىندا سەمەيدەگى قازىرگى كولىك كوللەدجىن ءتامامداپ, قولىما ديپلوم الدىم. ءبىز وسى وقۋ ورنىن بىتىرىسىمەن بىردەن اسكەري كوميسسارياتقا شاقىرىلدىق. ەگەر بىلەتىن بولساڭىزدار, اسكەرگە شاقىرۋ ماۋسىمى كوكتەم جانە كۇز ايلارىندا جۇرگىزىلەدى. سوعان قاراماستان جازدىڭ ورتاسىندا ارميياعا الىنىپ, الدىمەن بىرنەشە اي وقۋ – جاتتىعۋ جيىندارىنا قاتىسىپ, داعىدالانعان سوڭ سوعىس ءورتى تۇتانعان اۋعان شەكاراسىنان ءوتتىم. بىزدەن ەشكىم «سوعىسقا باراسىڭ با؟», – دەپ سۇراعان ەمەس. اسكەري انت قابىلداپ, قولىمىزعا قارۋ الدىق. سوعىس باسقا مەملەكەتتىڭ اۋماعىندا جۇرگىزىلسە دە, ءبىز ينتەرناتسيوناليستىك بورىشىمىزدى وتەدىك. وسىنى تۇسىنسەڭىزدەر ەكەن, ايتپەسە ءبىز ەشقانداي دا باسقىنشى ەمەسپىز, بەيبىت حالىققا وق اتقانىمىز جوق, -دەدى اۋعان سوعىسىنىڭ ارداگەرى الەكساندر تسۆەتكوۆ.

وقۋشىلار ارداگەرلەرمەن كەزدەستى

– الەكساندردىڭ ايتىپ وتىرعانىنا مەندە قوسىلامىن. كوپشىلىك كەڭەس اسكەرىنىڭ اۋعان جەرىنە ەنۋىن تۇرلىشە جورامالدايدى. بىراق شىندىقتى بىلە بەرمەيدى. اۋعان سوعىسىنا ءبىزدىڭ ارالاسۋىمىزدىڭ بىردەن ء–بىر سەبەبى – سول كەزدەگى اۋعان مەملەكەتىنىڭ باسشىسى ءبىزدىڭ ەل باسشىلارىنان كومەك سۇرادى. ەكىنشىدەن, ءبىز ءوز ەلىمىزدىڭ وڭتۇستىگىن قازىر «لاڭكەس»اتاپ جۇرگەن ءتۇرلى قارۋلى توپتاردان قورعادىق. سوعىستى اۋىزبەن ايتىپ جەتكىزۋ وڭاي ەمەس. قانشاما قارۋلاس دوستارىمىزدان ايىرىلدىق. سوندىقتان اۋعان سوعىسى وڭاي ءوتتى دەگەندەر بولسا, سەنبەڭىزدەر. ءوزىمىز 2 جىل سول مايداندا جۇرسەك تە, اتا-انا, تۋعان –تۋىسقاندارىمىزعا سوعىستا جۇرگەنىمىزدى ايتپايتىنبىز. ارينە ولار ءبىزدىڭ اۋعانستانداجۇرگەنىمىزدى ءبىلدى, بىراق سوعىسىپ جۇرگەنىمىزدى انىق بىلمەيتىن, – دەيدى سوۆەت مۇراتۇلى.

ارداگەرلەر ايتقان ەستەلىكتەردى تۇششىنا تىڭداعان وقۋشىلار سوعىس تاقىرىبىنان بولەك, ينتەرناتسيوناليست – جاۋىنگەرلەردىڭ جەكە باستارىنا قاتىستى ساۋالدارىن دا جولدادى.

كەزدەسۋدى مەكتەپ ديرەكتورىنىڭ بەيىندى ەكسپەريمەنتالدىق جۇمىستار جونىندەگى ورىنباسارى رايگۇل قايىركەنوۆا قورىتىندىلاپ, اۋعان سوعىسىنىڭ ارداگەرلەرىنە مەكتەپ ۇجىمى, وقۋشىلار اتىنان العىس ايتتى. سوڭىنان قوس جاۋىنگەرگە  مەكتەبىمىزدىڭ ونەرلى 8 سىنىپ وقۋشىلارىنىڭ قولىنان شىققان ءتولتۋىندىلارىن ەستەلىك رەتىندە تابىس ەتتى.

سەمەي قالاسىنداعى نازارباەۆ زيياتكەرلىك مەكتەبىنىڭ ءباسپاسوز قىزمەتى

ءبولىسۋ: 

پىكىر 0

مىندەتتى*