تەكتى ءبىلۋ تەكتىلىك دەسەك تە…

فۋتبولكا

استاناعا بارعان جاننىڭ «حانشاتىر» ويىن – ساۋىق ورتالىعىنا كىرمەي كەتەتىندەرى كەم دە كەم شىعار. تاياۋدا ەلىمىزدىڭ باس قالاسىندا بولعانىمدا اتالعان ورتالىقتىڭ 2-قاباتىندا جارناماسى شىنىنىڭ سىرتىنان جارقىراپ, جۇرگىنشىنى ەلەۋسىز ءوتىپ كەتە المايتىن ساۋدا نۇكتەسىنە مەن دە باس سۇقتىم. دۇكەندەگى ۇلتتىق ناقىشتا ورنەكتەلگەن كيىم ۇلگىلەرى تۇتىنۋشىنى وزىنە ەرىكسىز تارتاتىنداي ادەمى-اق. سابىرجان ايرين ەسىمدى قازاقستاندىق سانگەردىڭ اۆتورلىق كيىم ۇلگىلەرىنىڭ دۇكەنى ەكەن.

جاسىراتىنى جوق, قازاقستاندىق شەبەردىڭ ءسان الەمىنە حالقىمىزدىڭ ويۋ-ورنەگىمەن بەزەندىرىلگەن كيىم ۇلگىلەرىن اكەلگەنى قۋانتتى. التىن بارىس بەينەلەنگەن كۇرتەشە دە, ويۋمەن كومكەرىلگەن جەيدەلەر دە قازاق ەلىندە دايىندالعان تاۋار ەكەنىن انادايدان پاش ەتىپ تۇر.  دۇكەننىڭ ورتا تۇسىنا حالىق كوبىرەك جينالىپ قالىپتى. ەڭ جاقسى تاۋار سول جەردە بولار دەگەن ويمەن مەن دە جاقىندادىم…

قازاق رۋلارىنىڭ اتتارى جازىلىپ, رۋ تاڭبالارى   بەينەلەنگەن جازدىق   جەيدەلەردىڭ ءار الۋان تۇستەرى سامساپ تۇر. جالايىر, دۋلات, شاپىراشتى, ارعىن, نايمان, قىپشاق, ۋاق, كەرەي, اداي, بەرىش, تابىن… العاشقىدا اڭتارىلىپ قالعان مەن جان-جاعىما قاراسام, اركىم ءوز تەگى جازىلعان جەيدەنى ىزدەپ الەك. كەزدەسكەن بەتتە تانىستىقتى ءبىر – ءبىرىنىڭ رۋىن سۇراۋدان باس-تايتىن قازاققا بۇل جەردە ارتىق اڭگىمەنىڭ قاجەتى دە جوق. قاي رۋدان ەكەنى قولىنا ۇستاعان تاۋاردا جازىلىپ تۇر. «3 – 4 جاستاعى ادايعا ءدال جەيدەنىڭ اق ءتۇسى جوق پا ەكەن؟» دەپ جانىنا بارعان جىگىتكە ساتۋشى قاجەتىن تاۋىپ بەردى. پەندەمىز عوي, مەن دە اۋلەتىمىزدىڭ ەكى كىشكەنتايىنا ارناپ الايىن دەپ «ارعىنداردىڭ» جەيدەسىن قولىما ۇستاعان بەتىم ەدى, جانىما جاقىن كەلگەن بويجەتكەن: «ءسىز دە ارعىنسىز با؟» دەپ بەتىمە سۇراۋلى كوزبەن قارادى. جۇزىندە جاقىنىن كورگەندەي جىلىلىق بار, جىميىپ تۇر…  ەكى جەيدەنى الىپ, ساتۋشىمەن ەسەپ ايىرىستىم. مەنەن كەيىن جاڭاعى «تۋىسىم», ودان ءارى كەزەكتە دۋلات, كەرەي, نايمان, اداي, شاپىراشتى باۋىرلار تۇرعان…

التى الاشتىڭ باس قوسقان استانادا قاي رۋدىڭ وكىلدەرى جوق دەيسىڭ؟ ەندەشە, وسى جەردەگى ەڭ ءوتىمدى تاۋار دا رۋ اتتارى جازىلعان جەيدەلەر سيياقتى.

سىرتقا شىعىپ اينالاما كوز تاستادىم. بۇرىن بايقالا بەرمەيتىن ۇيرەنشىكتى كورىنىس وسى جولى باسقاشا كورىندى. ارينە قازاقتىڭ استاناسى بولعاندىقتان جۇرگىنشىلەردىڭ دە باسىم بولىگى جەرگىلىكتى ۇلت بولۋى زاڭدىلىق. دەگەنمەن, ءبارىمىز سابىرجان ءايريننىڭ جەيدەلەرىن كيىپ كوشەگە شىعىپ كەتسەك نە بولار ەكەن… ويلاۋدىڭ ءوزى قورقىنىشتى سيياقتى… تاۋار وتكىزۋ ءۇشىن كاسىپكەرلەر نە ويلاپ تاپپايدى دەسەڭىزشى! رۋىنىڭ اتى ايتىلسا, ورتكە تيگەن داۋىلداي ورەكپي جونەلەتىن قازاق بالاسى ءۇشىن بۇگىن رۋجاندىلىق ەمەس, ۇلتجاندىلىق كەرەك ەكەنىن ەستەن شىعارىپ الماساق بولعانى.

ريزا مولداشەۆا

ءبولىسۋ: 

پىكىر 3

مىندەتتى*
  1. مارات: دۋرىس كوپ بوپ كەتتي وسىنداي
  2. زاۋرە: جاقسى عوي فۋتبولكادا رۋىڭ تۇرسا نەسى جامان؟
  3. Quwanış: QAZAQ ruwdan quraladı, tamırın tereñge jayğan bäyterektey!